يارب احميني من تصنيفات المؤمنين

ديڤيد ويصا
ربي ..
في خدمتي وكنيستي ..
احميني من تصنيفات المؤمنين ..
اللي بترفض مُدمن السّيجارة، لأنه بيؤذي هيكل روحك، جسده ..
وبتقبل مُدمن الأكل المُضِرّ، مع إنه بيؤذي هيكل روحك، جسده!

وبتقبل مؤمنين بيوتهم خربانة بس مكمِّلين عشان يتقبلوا ..
وبترفض مؤمنين مستحملوش الخراب فانفصلوا، ومش مقبولين!
وبتقبل خُدّام محافظين على صورة وقناع، عشان يتقبلوا ..
وبترفُض خُدّام بيشاركوا بضعفاتهم على أمل يتحِضنوا، ومش مقبولين!
--

وحتّى إن جِه اليوم اللي يتشطِب عليَّ من ناس ..
نوَّر لعيني قيمتي الثابتة عندك وفي عينيك ..
وانك مش بتُشطب عليَّ مهما اتداست من الناس!
وان جِه اليوم اللي اتفضّ من حواليَّ الناس ..

دفِّيني واحضُنّي بمعِيِّتَك وسندِتَك، من غير الناس!
وان في يوم خافوا يسندوني عشان شكلهم قُدّام الناس ..
احفظني واقف بيك وبين إيديك، من غير الناس!
--

ده انت اللي بتسند السّاقطين، وتعدِل ضهر المنحنين ..
وانا قُدّام الناس لو مَحني، بين إيديك لا يمكن انحني لناس!
آمين!