نصايح للأمهات..

د.امير فهمي زخاري المنيا
- لسة فيه أم بتنيم ابنها الرضيع على بطنه فترات طويله و ما تعرفش إن ده بيزود خطر الإصابة بالموت المفاجئ للرضع !!!

- لسة فيه أم ما تعرفش إن الرضاعة الطبيعية رقم واحد في أول ٦ شهور من عمر الطفل ، من غير اعشاب و لا ينسون و لا أكل و لا ميه !!!

- لسة فيه أم بتشرب ابنها بيبي درينك... الاعشاب يعنى ..رغم إن وزارة الصحة حظرت استخدامه!!

- لسة فيه أم بتعمل لولادها بيات شتوي من غير استحمام وحرماه من الخروج !!!

و ما تعرفش إن قلة الاستحمام بتجيب جرب وقلة الخروج بتأثر على نفسية الطفل!!!

- لسة فيه أم ما تعرفش إن الخنفرة و الزغطة ظواهر طبيعية في الشهور الأولى !!!

- لسة فيه أم ما تعرفش إن فيه جرعة تطعيم ڤيروس بي في أول ٢٤ ساعة من عمر الطفل !!!

- لسة فيه أم ما تعرفش إن ڤيتامين ك حقنة بعد الولادة للطفل بيحميه من النزف و ڤيتامين د ٤٠٠ وحدة "ڤي دروب ٤ نقط " من الشهر التالت لعمر سنة يحمي من لين العظام !!!

- لسة فيه أم ما تعرفش إن الصفرا مش عاوزة ڤيتامينات ولا لمبة نيون..عاوزة كشف وتحليل ومتابعة أو حضانة !!!

- لسة فيه أم بتربط سرة المولود بحزام وما تعرفش إن ده هيخليها تلتهب وإنها هتروح لوحدها في الغالب من غير ربطها !!!

- لسة فيه أم بتضرب إبنها عشان بيبلل سريره وهو نايم وما تعرفش إن الضرب بيزود الموضوع !!!

- لسة فيه أم بتكحل المولود وتغربله وما تعرفش إن الرصاص في الكحل يضر الطفل والغربلة تعمل نزيف في المخ !!!

- لسة فيه أم قلقانه من قشرة الرأس للمواليد كل ما تشيلها بفرشاة و زيت زيتون ترجع وما تعرفش إنها من سن ٦ شهور لسنة هتختفي تماماً !!!

- لسة فيه أم ما تعرفش تحمي طفلها ازاي من إنه يشرق في أكل أو ألعاب صغيرة:
 بإنها تمنع المكسرات خصوصا الفول السوداني واللب ونشيل أي لعب صغيرة من قدامه ولو شرق تقلب الطفل على بطنه وتخبطه على ظهره خمس ضربات وترجع تقلبه على ظهره وتضغط في نصف صدره خمس ضغطات وتنقذ حياته !!!

- لسة فيه أم بتقلق لما تشوف بروز في ثدي الوليد وبعض نقاط اللبن وتعصرهم وما تعرفش إن دي ظاهرة حميدة من هرمونات الأم والتعصير ممكن يعمل خراج للطفل !!!

- لسة فيه أم ما تعرفش إن نوم الرضيع متقطع جداً وبيبدأ ينتظم عند ٦ شهور والمفروض تقلق لو الطفل نايم وخملان ومش راضي يرضع !!!

- لسة فيه أم ما تعرفش إنه الكالسيوم مش ڤيتامين وانه مبيتاخدش من غير تحليل دم يثبت نقص الكالسيوم ...
 وان الكالسيوم بدون داعي يترسب في الكلى !!!

- لسة فيه أم ما تعرفش علامات تأخر  تطور طفلها:
شهر ما بيتخضش من الصوت العالي ،
شهرين ما ضحكش،
تسع شهور ما قعدش ،
سنة و نصف ما مشيش!!!

- لسة فيه أم ما تعرفش إن وزن طفلها بيتضاعف ٣ مرات في عمر سنة و طوله بيزيد بنسبة ٥٠٪
ومع كل زيارة للوحدة الصحية أو الطبيب لازم تقيس وزن و طول ومحيط رأسه!!!
شيروا  للأمهات اللي لسه معرفتش واكسبوا ثواب...
د.امير فهمي زخاري المنيا