حكاية الهكسوس الجزء الثاني العجلات الحربية والهكسوس

وإيه موضوع العجلات الحربية اللي بتشوفها في التماثيل والرسوم المصرية القديمة.. واللي المؤرخين بيعتبروها بمثابة عبور خط برليف للحضارة المصرية القديمة، وخليني أقولك ازاي، وأوعدك بالإستمتاع وانت بتقرأ:

 

من حوالي 3500 سنة مصر كان في عهد الأسرة " الثانية عشر" تعيش في رخاء من تجارة لزراعة لفنون، بإختصار كانت من أزهى عصور الدولة المصرية، بينما كثير من جيرانها كان عندهم مشاكل إقتصادية ومجاعات وده دفع بعض القبائل والشعوب إنهم يروحوا لأرض الخير مصر، ومن ضمن الشعوب دي جماعة بدو رحالين جاءوا من فلسطين وسوريا وتركيا (على اغلب الأقوال) ودول يا سيدي هم الهكسوس..

 

مصر استقبلتهم بحفاوة وخدوا منطقة تعتبر مهجورة ناحية " فاقوس" بالشرقية دلوقتى واسمها في الوقت ده "أفاريس".. وبدأوا يقيموا مجتمع ع الضيق كدة وأعادوا ترميم المباني هناك.. وانصهروا في المجتمع المصري القديم وبدأوا يلبسوا زيهم، وكانوا شاطرين في التجارة الحقيقة، وده بسبب إنهم احترفوا وسائل النقل اللي المصريين القدماء ماكانوش يعرفوها وهي الخيول..

 

وده أدى إن دولتهم تكبر ويسمع بيها أقرانهم فييجوا ينضموا ليهم بالآلاف وكل ده وهمه لحد دلوقتى مسالمين.. بل بالعكس دول عملوا إنتعاش تجاري في المنطقة دي، وفضل الوضع كدة لحد ما جاءت " الأسرة الثالثة عشر " وبدأ الإنهيار الإقتصادي والإداري يزيد بسبب سيطرة بعض رجال الدولة من ذوي الكروش المتدلية على المناصب والأموال.. وكل ده ونفوذ الجماعة الهكسوس بيزيد ومش بس كدة دول بدأوا يتوسعوا ويكون ليهم قوة سياسية وليهم حاكم..

انتهت الاسرة الثالثة عشر وجاءت "الرابعة عشر" واستمر مسلسل الإنهيار ومعاه منحنى سيطرة الهكسوس الملاعين بيزيد وأصبح ليهم دولة مستقلة وجيش قوى لدرجة إن في نهاية حكم الأسرة الرابعة عشر كانوا أصبحوا تحت حكم الهكسوس وتابعين ليهم... وهنا هايكون أول ظهور للهكسوس كحكم أوحد وأصبحوا "الأسرة الخامسة عشر" الحاكمة، وبالمناسبة من هنا جاء إسمهم (هيقا خاسويت) ومعناها "الملوك الرعاة" واللي اتحورت لحد ما وصلت لعندك " الهكسوس"..

 

فضل الهكسوس بيحكموا مصر يسرقوا وينهبوا في خيرها ومواردها لحد ما ضاق المصريين بشوية الحرامية الي ماسكين مقدرات البلد.. وظهرت الأسرة السابعة عشر على استحياء لإنهم ماكانوش بيحكموا مصر كلها زي زمان، فحكمهم اقتصر فقط على طيبة وشوية مدن صغيرة حولها لإن معظمها كان تحت سيادة الهكسوس، وفي المقابل الأسرة الحاكمة المصرية السابعة عشر كانت بتدفع لهم ضرائب ضخمة..

 

لحد هنا ومفيش مواجهة عسكرية حقيقية وده لإن الهكسوس كانوا متميزين عسكريا بمعدات متطورة عن المصريين وقتها.. والأهم من ده كله السلاح الفتاك وهو " العجلات الحربية " اللي كانت بمثابة مدرعة شديدة الفتك في ذلك الزمان وفخر المصانع الحربية..

 

وكانت عبارة عن ثلاثة خيول " مربربة" بتجر عربة خشبية على شكل مثلث وداخلها ثلاثة فرسان واحد معاه درع يصد الهجوم والنبال – وواحد يقود – وواحد معاه مجموعة حراب يلوش بيها يمين وشمال اللي إيديه تطوله والعربة تسير..

 

طيب فين المشكلة ما نعمل زيهم؟

 

هأقولكم المشكلة فين في الجزء الثالث من حكاية الهكسوس ... تحياتي.