نصائح وتجارب منزليه لهواه التطبيخ والمطبخ 1

د.أمير فهمى زخارى المنيا
1- البصل هاتى نص كيلو قشريه وافرميه فى الكبة أو ابشريه بالمبشره حطيه فى أكياس بلاستيك وافرديه ودخليه الفريزر وانتى بتطبخى اكسرى قطعه هيوفر معاكى كتير.

2- الثوم هاتى ربع كيلو ثوم وقشريه كله وحطيه فى برطمان ودخليه الثلاجة اى طبيخ فى اخر خمس دقايق اهرسى فص واحد وحطيه هيبقى كانك حطيتى رأس ثوم.

3- الكفتة زودى عليها رغيف عيش مبلول ومتصفى وحطى التوابل والبصل ومعلقة دقيق وصبعى الكفتة ورصيها فى صينية ودخليها الفرن هيزود الكمية النص.

4- الطماطم حطى ربع كيلو فى الخلاط مع معلقة صغيرة بابريكا واضربى كويس واطبخى بيها كانك طبختى بكيلو طماطم.

5- اي حاجة خضراء عيزاها تفضل خضراء أطول فترة ممكنة: زي نعناع .. بقدونس .. جرجير .. كسبرة .. ملوخية .. سبانخ... انسي قصة الفويل والاكياس والمناديل , حطيها في برطمان بدون غسيل مع معلقة معدن (ملعقة الطعام) , اغلقيه كويس هيقعد اخضر زي ماهو في الثلاجة ٣ أسابيع.

6- عندك مطحنة وطحنتى توابل والريحة مش راضية تروح وعايزة تطحنى سكر.. اغسليها واطحنى فها شوية عيش محمص.

7- الملح بتاعك بيرطب فى علبته حطى كام حبة رز جوا العلبة.

8- عايزة تشربى شاى مظبوط هاتى برطمان ازاز وتلخبطى كم نوع على بعض بيدى لون وطعم خرافه.

9- حطي التوابل في درج الثلاجة عشان الحراره بتخليها تسوس وتفقد نكهتها.

10- ضيفي نص معلقه صغيرة سكر علي اي تسبيكة طماطم بتعادل حموضة الطماطم وتخليها خفيفه على المعدة.

11- لو عندك بكينج_صودا مركونه وعاوزه تعرفي لسه صالحه حطي معلقه منها علي معلقه خل لو عمل فوران تبقي صالحه للاستخدام.

12- عندك جبنة نشفت في الثلاجة انقعيها في شوية لبن سخنين واضربيها في الخلاط مع معلقة قشطة هتبقي جبنه كريمي تحفه.

13- لو الاكل بقي مالح قشري بطاطسيه وقطعيها مكعبات وحطيها علي الأكل وهو علي النار وشيليها قبل التقديم.

14- لو عندك مقص مش بيقص كويس هاتي ورق فويل قوي واعملي منه طبقات فوق بعض وقصيها بالمقص كذا مره هيرجع جديد.

15- البقوليات لازم ننقعها مش اقل من تسع ساعات ونغير المية كمان قبل السلق لأن فيها مادة تعوق امتصاص الحديد من الجسم.

16- الرز البايت نشف ومش هيتاكل اعمل ايه؟؟
ضيفي عليه نص كوبايه ميه وسخنيه علي نار متوسطه هيبقا كأنك لسه عملاه طازه.

أو الرز البايت جمعيه فى علبة فى الفريزر وسخنيه فى يوم حطيه فى مصفاه وغطيه وتحطيه حلة ربعها ميه وحطيه على النار يسخن على البخار بيبقى كانك لسه عملاه حالا.

17- المكرونة بالصلصة لو بايته حطيها فى صينية وحطى على وشها اى جبن عندك وفلفل وزيتون ودخليها الفرن من جمالها هيتخانقوا عليها.

18- الشوربة الزايدة حطيها فى أكياس وعلى الفريزر هتنفعك تسقى محشى أو تعملى ملوخية أو اى طبيخ احلى من المرقة

19- تسليك الحوض والبلاعات فى ثوانى بطريقة مضمونة بدون تعب وانسي الانسداد للابد مش هتسلكيها تانى.!!

المكونات: معلقة ملح ليمون. معلقة بيكنج بودر. معلقة كوب خل. كوب ماء ساخن.

طريقة تحضير هذه الخلطة:
*يتم خلط ملح الليمون مع البيكنج بودر جيدًا، ثم يتم وضع المزيج في فتحة حوض المطبخ أو الحمام. قم بوضع كوب من الخل. بعد ذلك، نقوم بإضافة الماء الساخن على الفور.

سوف تلاحظ حدوث فوران عند فتحة الحوض.

بعد هذه المرحلة، نلاحظ أن الحوض بدأ يغلي مما يتيح له أن يتم تسليكه في دقيقة واحدة.

*طريقه تانيه لتسليك الحوض بخلطة المياه الغازية وبيكربونات الصوديوم
اخلط كوبًا من المياه الغازية مع ملعقة من بيكربونات الصوديوم، ثم ضع المزيج في الحوض بعد خلطه جيدًا. بعد ذلك، قم بفتح الماء الساخن في الحوض، وستلاحظ أن الانسداد قد تم حله على الفور، مما أدى إلى تصريف سريع لمياه الحوض.

20-  لحفظ الليمون نلف كل ليمونه فى ورق فويل او ورق جرايد ونحطهم فى علبه كده بيعيش مده اطول....و لو عايزه تحتفظي بالليمون للموسم كله حطيه فى كيس في الفريزر وعند الاستخدام خرجي الليمون وتحت الميه علي طول هيرجع زي الاول.

-  لو وقعتى زيت على الارض متجريش تجيبى فوطة وتمسحيه لا رشي عليه ملح وسبيه دقيقتين تلاتة وبعدين اكنسية بالمقشة والجاروف واتفاجئي بالسحر ولا اكن في حاجة وقعت.
وللحديث بقيه ... تحياتى.
د.أمير فهمى زخارى المنيا