بمناسبة الهوجة بتاعة فيه جحيم ولا كل الناس هتَخلُص

ديڤيد ويصا
بمناسبة الهوجة بتاعة فيه جحيم ولا كل الناس هتَخلُص ..
من كام سنة كانت أول مرة اقابل مسيحي بينكر الجحيم ..
وبيقول ان كل الناس هتَخلُص، بحجّة ان الله محبّة وكده ..
فبمنتهى البساطة والتلقائيّة بقولّه ..

يعني كلام يوحنا عاجبَك لما قال:
"لأنه هكذا أحب الله العالم، حتى بذل ابنه الوحيد ..
لكي لا يهلك كل من يؤمن به" (يو١٦:٣)

ولما قال:
"الذي يؤمن بالابن، له حياة أبدية ..
والذي لا يؤمن بالابن لن يرى حياة ..
بل يمكث عليه غضب الله." (يو٣٦:٣)
معجَبَكش؟
قال لي: آه مش عاجبني!
--

أعتقد ان إجابة صاحبي ده ..
بتلخَّص رأي ناس كتير من اللي بيرفضوا الجحيم!
(مش كلهم للأمانة عندهم نفس المنطق)
ده مش معناه اني مستوعب الجحيم أو مرتاح ليه ..
بس فيه فرق بين اني احاول افهم إيه هو الجحيم ..
واني ارفضه بحجّة ان المسيح لا يمكن يعمل كده ..

لأن ساعتها السؤال البديهي اللي هسأله: أنهو مسيح؟
المسيح اللي قدِّمه لينا الكتاب المقدّس (اللي مش عاجبَك)؟
ولا المسيح اللي انت عاوز تقدِّمهولنا (واللي ميلزَمنيش)؟
مش هدفي ولا ناوي اجادل واناقش ..
لأني بقيت خلاص شايف ان اللي عاوز يتعلّم، لازم يقرا!
ديڤيد ويصا