"أنتي مسيحية ولا مسلمة وأمتى خلعتي الحجاب وبقيتي مش محترمة".. تفاصيل واقعة فتاة الفستان داخل لجنة امتحانية بجامعة طنطا

كتبت - أماني موسى
كشفت طالبة جامعة طنطا حبيبة طارق، المعروفة بـ«فتاة الفستان» تفاصيل الواقعة، حيث أوضحت أن المراقبين قاموا بانتهاك حريتها وسبها بسبب ارتداءها فستان.

"أنتي مسلمة ولا مسيحية"؟
وقالت حبيبة طارق، الطالبة بالفرقة الثانية بكلية آداب جامعة طنطا، في مداخلة مع الإعلامي عمرو أديب، بعد أن أنهيت الامتحان قمت بأخذ بطاقتي من المراقب المتواجد خارج اللجنة، فسألني: "أنتي مسلمة ولا مسيحية"، فأجبته أنا مسلمة.

وبعدها وجدت سيدتين مراقبتين إحداهما تقول للأخرى: تعالي شوفي دي لابسة إيه؟ وقالت لها بصوت عالي أمام جميع اللجان: هو أنتي نسيتي تلبسي بنطلونك ولا إيه؟ فأجبتها بنطلون إيه اللي هلبسه على الفستان؟ وتابعت: وجدت نفسي بين السيدتين يقومن بتبادل "تهزيقي" وأنا مش ملاحقة أرد، ومش عارفة إيه الغلط اللي أنا عملته؟ وليه بيتكلموا معايا بالشكل دة؟

هو أنتي قررتي تبقى مش محترمة وقليلة الأدب وخلعتي الحجاب؟
ثم سألتني أحداهما "هو أنتي مسلمة أصلا ولا مسيحية"؟ مشيرة إلى أن السيدتين كن يرتدين إحداهما نقاب والأخرى خمار، وقالت إحداهن للأخرى: "لا دي مسلمة أنا شفت بطاقتها وكانت محجبة وقلعت الحجاب"، ثم وجهت كلامها لي: هو أنتي قررتي تبقى مش محترمة وقليلة الأدب وخلعتي الحجاب؟

فأجبتها: احترام وأدب إيه اللي هنربطه بحجاب؟ دة حاجة بيني وبين ربنا، ليه بتحكمي عليا، فقالت لي المنتقبة: أنتي منين أصلاً؟ فقولت لها أنا من إسكندرية، فقالت لها الأخرى: ما أنا برضه قلت كدة، هما الإسكندرانية كدة.

وقالت الفتاة، أنا فعلا مش عارفة أنا اتهاجمت ليه؟ وأنا مكنتش لابسة لبس وحش أو شفاف أو قصير، والناس كلها بقت شايفة اللي حصل وبتبص لي، وأنا اتكسفت جدًا.

عمرو أديب: دة تمييز ديني والكلام دة انتهى من زمان
ثم استطردت إحداهن وقالت لي: هتعملي إيه لو أنتي ماشية والفستان اترفع من الهوا؟ عيب كدة، ربنا يهديكي وترجعي لحجابك أصل دي فترة والله وهتعدي.

وأختتمت، الناس اتفرجت عليا وبقيوا ينادوا بعض عشان يتفرجوا عليا!

وعلق عمرو أديب قائلاً: دة تنمر وتمييز ديني، مينفعش نسأل الناس أنت مسيحي ولا مسلم؟ دة كلام انتهى من زمان.



الجامعة ستفتح تحقيقًا في الواقعة
جدير بالذكر أن الدكتور وليد العشري، المتحدث الرسمي باسم جامعة طنطا، أوضح بأنه لا توجد أي شكوى رسمية وجهت إلى إدارة الكلية من قبل الطالبة في هذا الشأن، مؤكدًا أن الجامعة ستفتح تحقيقًا على الفور في الواقعة بصرف النظر عن وجود شكوى رسمية من عدمه، وسيتم الإعلان عن نتائجها للجميع.